ഏഷ്യയിലെ ഏറ്റവും വലിയ ക്രൈസ്തവ സംഗമമായ മാരാമൺ കൺവെൻഷന് പമ്പ തീരം ഒരുങ്ങി. നുറ്റി ഇരുപത്തി ഏഴാമത് മാരാമൺ കൺവൻഷൻ ഈ മാസം പതിമൂന്നാം തീയതി മുതലാണ് ആരംഭിക്കുന്നത്. പതിമൂന്നാം തീയതി മുതൽ ഇരുപതാം തീയതി വരെയാണ് കൺവെൻഷൻ നടക്കുന്നത്. കോവിഡ് മാനദണ്ഡങ്ങൾ പൂർണ്ണമായും പാലിച്ചു കൊണ്ട് രാവിലെയും വൈകുന്നേരവും മാത്രമാണ് യോഗങ്ങൾ നടക്കുന്നത് .
സാമൂഹിക അകലം പാലിച്ച് 5000 പേർക്ക് ഇരിക്കാവുന്ന പന്തലാണ് കൺവൻഷനായി മാരാമണിലെ പമ്പാതീരത്ത് ഒരുക്കിയിരിക്കുന്നത്. ഒരു ലക്ഷത്തോളം വിശ്വാസികൾക്ക് ഒരേ സമയം ഇരിക്കാവുന്ന പന്തലാണ് സാധാരണ ഒരുക്കുന്നത്. എന്നാൽ കോവിഡ് മാനദണ്ഡ പ്രകാരമാണ് പന്തലിന്റെ വലുപ്പം കുറച്ചിരിക്കുന്നത്.പൂർണ്ണമായും തുറന്ന രീതിയിലുള്ള പന്തലുകൾ ഒരുക്കിയിരിക്കുന്നതിനാൽ കോവിഡ് വ്യാപന ഭീഷണി കുറവാണെന്നും മാരാമൺ കൺവെൻഷർ സംഘാടകർ ആത്മവിശ്വാസം പ്രകടിപ്പിക്കുന്നു. കഴിഞ്ഞ തവണയും മാരാമൺ കൺവൻഷനുമായി ബന്ധപ്പെട്ടു കോവിഡ് വ്യാപനം ഉണ്ടായിരുന്നില്ല എന്നതും ശ്രദ്ധേയമായ കാര്യമായിരുന്നു .
മാരാമൺ കൺവൻഷൻ നടത്തിപ്പുമായി ബന്ധപ്പെട്ടു വിവിധ സർക്കാർ വകുപ്പുകളുടെ ഏകോപിച്ചുള്ള പ്രവർത്തനം പമ്പാ മണൽപ്പുറത്ത് ആരംഭിച്ചു. ജലസേചനം, ഗതാഗതം, വൈദ്യുതി, ആരോഗ്യം, പൊലീസ്, എക്സൈസ്, അഗ്നിശമന സേന, ടെലികോം എന്നീ വകുപ്പുകളുടെ പ്രവർത്തനമാണ് മാരാമൺ കൺവൻഷനു വേണ്ടി ക്രമീകരിച്ചിരിക്കുന്നത്
പതിമൂന്നിന് ഉച്ചയ്ക്കു ശേഷം 2.30ന് മാർത്തോമ്മാ സഭാധ്യക്ഷൻ ഡോ. തിയഡോഷ്യസ് മാർത്തോമ്മാ മെത്രാപ്പൊലീത്തയാണ് മാരാമൺ കൺവൻഷൻ ഉദ്ഘാടനം ചെയ്യുന്നത്. സുവിശേഷ പ്രസംഗ സംഘം പ്രസിഡന്റ് ഡോ. യുയാക്കിം മാർ കുറിലോസ് സഫ്രഗൻ മെത്രാപ്പൊലീത്ത അധ്യക്ഷ സ്ഥാനം അലങ്കരിക്കും .
മാർത്തോമ്മാ സഭയിലെ ബിഷപ്പുമാരെ കൂടാതെ ശ്രീലങ്കയിൽ നിന്നുള്ള ബിഷപ് ദിലോരാജ് ആർ. കനകസാബെ, ചെന്നൈയിൽ നിന്നുള്ള റവ. ഡോ. ജോൺ സാമുവേൽ പൊന്നു സാമി, നാഷനൽ കൗൺസിൽ ഓഫ് ചർച്ചസ് ജനറൽ സെക്രട്ടറി റവ. അസിർ എബനേസർ എന്നിവരാണ് മാരാമൺ കൺവെൻഷനിലെ മുഖ്യ പ്രഭാഷകർ17നു രാവിലെ 10നു വിവിധ സഭകളുടെ ഐക്യ സമ്മേളനം ഓർത്തഡോക്സ് സഭാ അധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് ത്രിതീയൻ കാതോലിക്കാ ബാവ ഉദ്ഘാടനം ചെയ്യും. വിവിധ ക്രൈസ്തവ സഭകളെ പ്രതിനിധീകരിച്ച് മേജർ ആർച്ച് ബിഷപ് കർദിനാൾ മാർ ബസേലിയോസ് ക്ലീമീസ് കാതോലിക്കാ ബാവ, മാർ ഔഗിൻ കുര്യാക്കോസ്, ബിഷപ് മലയിൽ സാബു കോശി ചെറിയാൻ, കുര്യാക്കോസ് മാർ തെയോഫിലോസ് എന്നിവർ വിവിധ യോഗങ്ങളിൽ പ്രസംഗിക്കും.
കൺവൻഷൻ യോഗങ്ങളുടെ തൽസമയ സംപ്രേഷണം ചാനലുകളിലൂടെയും ഓൺലൈൻ വഴിയും നടത്തും. രാവിലെ 10നും വൈകുന്നേരം 5നും പൊതുയോഗങ്ങൾ നടക്കും. സ്ത്രീകൾക്കും പുരുഷന്മാർക്കുമായുള്ള ബൈബിൾ ക്ലാസുകൾ രാവിലെ 7.30 മുതൽ പന്തലിൽ നടക്കും. കുട്ടികൾക്കായുള്ള ബൈബിൾ ക്ലാസുകൾ രാവിലെ 7.30 മുതൽ ഓൺലൈനായി നടക്കും. യുവജനങ്ങൾക്കായുള്ള യുവവേദി യോഗങ്ങൾ വ്യാഴം മുതൽ ശനിവരെ നടക്കും. കലക്ടർ ഡോ. ദിവ്യ എസ്. അയ്യർ ഉദ്ഘാടനം ചെയ്യും. വിവിധ യോഗങ്ങളിൽ ഡോ.വി.എസ്. പ്രിയ, പത്മശ്രീ ജേതാവ് ശോശാമ്മ വർക്കി, ഡോ. വിനിൽ പോൾ എന്നിവർ പ്രസംഗിക്കും. മാരാമൺ കൺവൻഷനു വേണ്ടി പ്രത്യേകം രൂപീകരിച്ച ഗായക സംഘത്തിന്റെ ഗാനശുശ്രൂഷയും ഓരോ യോഗങ്ങളിലുണ്ടായിരിക്കും .